Skills: takrorlanadigan ish tartibini bir marta oʻrgatib qoʻyish

Agar bir xil koʻrsatmani uchinchi marta yozayotgan boʻlsangiz — u skill boʻlishi kerak.

Skill — bu oddiy papka va ichida SKILL.md fayli. Claude uni koʻradi, tavsifiga qarab qachon kerakligini oʻzi tushunadi va oʻsha koʻrsatmalarni ishga soladi.

Qayerda turadi

~/.claude/skills/<nom>/SKILL.md        # barcha loyihalarda ishlaydi
<loyiha>/.claude/skills/<nom>/SKILL.md # faqat shu loyihada

Loyihaga tegishli qoidalarni loyiha ichida saqlagan maʼqul — jamoadagi boshqalar ham repo bilan birga oladi.

Eng oddiy skill

---
name: commit-yozish
description: Git commit xabarini loyiha uslubida yozadi. Foydalanuvchi commit soʻraganda ishlatiladi.
---

# Commit xabari

- Conventional Commits: `feat:`, `fix:`, `refactor:`, `docs:`
- Sarlavha 50 belgidan oshmaydi, nuqta qoʻyilmaydi
- Tana qismi faqat «nega» tushunarsiz boʻlganda yoziladi
- Oʻzbekcha yoziladi, ingliz atamalari oʻzgarishsiz qoladi

Misol:
fix: sessiya cookie logout dan keyin oʻchmayotgani tuzatildi

description eng muhim qator: Claude aynan shunga qarab skillni qachon ishlatishni hal qiladi. «Commit» soʻzi tavsifda boʻlmasa, skill chaqirilmay qolishi mumkin.

Nima uchun yaxshi

• Bir marta yoziladi. Har suhbatda uslub qoidalarini takrorlash shart emas.
• Kontekst tejaladi. Skill faqat kerak boʻlganda oʻqiladi, har doim emas.
• Jamoa bilan boʻlinadi. Repo ichida boʻlsa, hamma bir xil natija oladi.

Menda ishlagan skill'lar

Dizayn skilli ayniqsa foydali chiqdi: yangi sahifa qoʻshganda ranglar va animatsiya oʻz-oʻzidan mos keladi, «yashil rangimiz qaysi edi?» degan savol yoʻqoldi.

Skill yozdirish

Skillni ham modelga yozdirish mumkin:

Shu suhbatda kelishilgan dizayn qoidalarini skill qilib rasmiylashtir.

Fayl: .claude/skills/dizayn-tizimi/SKILL.md
Frontmatterda name va description boʻlsin — description da bu skill
qachon ishlatilishi aniq yozilsin.

Ichida: rang tokenlari, shrift rollari, animatsiya qoidalari, «emoji
ishlatilmaydi» qoidasi. Qisqa va roʻyxat koʻrinishida.

Skill va prompt farqi

• Prompt — bir martalik topshiriq
• Skill — takrorlanadigan ish tartibi

Agar koʻrsatma faqat shu vazifaga tegishli boʻlsa, uni skill qilmang: skill qancha koʻp boʻlsa, tanlash shuncha chalkash boʻladi.

Qachon ishlamaydi

Skill — bu qoidalar, sehr emas. Agar tavsif noaniq yozilgan boʻlsa (description: yordam beradi), model uni qachon ishlatishni bilmaydi va skill shunchaki yotib qoladi. Tavsifda trigger soʻzlar boʻlishi kerak: «commit», «PR», «UI yozishda», «deploy qilishda».